Tags
Brisbane het onlangs ‘n oulike skema begin in die middestad: Daar is 150 fietsstasies opgerig, waar jy ‘n fiets kan gryp en dan van een punt na die ander in die stad kan rondrits.
Dit werk so: Jy registreer en ontvang ‘n elektroniese gebruikerskaart, wat jy dan by enige stasie kan gebruik om ‘n fiets van die staanrak te ontkoppel. Gebruik is gratis, mits jy die fiets binne 30 minute weer by enige ander stasie gaan parkeer. Jy kan dus heeldag verniet rondry as jy jou roete reg beplan.
Daar is ‘n rekenaarsisteem by elke stasie met ‘n skerm wat vir jou vertel waar die anders staanplekke is en ook hoeveel fietse daar geparkeer staan.
Alles is elektronies, selfs die slotte. Jy gebruik jou kaart om ‘n fiets los te klik of weer in die rak te parkeer.
Mmm . . . Die saal lyk heel gemaklik. Volgende keer as ek weer die stad besoek, gaan ek die fiets-ding uitprobeer.
* * *
Wat ’n wonderlike idee! Dit moet geweldig verligting bring vir die stad se parkeer- en verkeersprobleme. Ek veronderstel dat die infrastruktuur reeds in plek is, kan nie dink dat dit kan werk sonder spesiale bane vir die fietsryers nie. Dit kan seker ook nie heeltemal gratis wees nie, iewers moet versteekte koste wees. Kyker, ek wonder of die ouens nie dalk vooruit betaal by registrasie van die kaart nie. Met SA se gevestigde kultuur van misdaad en gebrek aan respek vir ’n ander se lewe, wat nog privaat eiendom, sal so ’n projek nooit die lig sien nie – maar ons kan bly droom…
Dankie Plekkie. Ja-nee: Ek dink ook dis sommer ‘n voorslag-plan. Brisbane is wel fiets-vriendelik, maar hulle het minder toegewyde fietspaaie as Perth. Ek dink die idee is dat mense in Brisbane oor kort afstande met die fietse moet pendel, tussen treinstasies, winkels en kantore. In Perth is die situasie anders: Jy kan sommer lekker ver ry. Hier by die werk is daar byvoorbeeld iemand wat elke dag per fiets kantoor toe kom en hy kan ongeveer 25 km van die afstand op ‘n spesiale pad net vir fietse en stappers ry.
Daar is in Brisbane ‘n registrasiefooi en deposito betaalbaar wanneer jy aansoek doen vir ‘n gebruikerskaart. As jy dan die 30-minute gebruiksperk tussen fietsstasies oorskry, betaal jy ‘n paar dollar per uur. Indien jy egter altyd die fiets elke 30 minute terughandig by ‘n ander stasie op jou roete, kan jy die stelsel basies altyd verniet gebruik.
Ten laaste: Mens moet nooit opgee op jou drome nie, kom wat wil.
Ek het gelees hulle het so stelsel in (ek dink) Parys ook begin.
Hierdie idee word in verskeie stede in Europa uitgevoer en vind nou ook hier in die Ooste beslag. Feit van die saak is dat die lande/stede wat dit implementeer ook fietsvriendelik. Dws daar is ‘n netwerk van toegekende fietspaaie. Ongelukkig sien ek nie dat so-iets in SA suksesvol sal wees nie. Die rede(s) is voor die hand liggend.
Ja-nee. Dis jammer oor SA.
Dis verblydend om te sien dat nuwe woonbuurte hier van die begin af uitgele word met fietspaaie deel van die plan.
Dis SO cool! Nee genade – in SA sal hulle seker die fietse steel
Daar is al so baie Suid Afrikaners hier in Australie. Dis ‘n wonder die fietse raak nie ook hier weg nie. Hehe.
Hier in London het hulle ook ‘n fiets-projek. Ek het nie daaroor gaan lees nie, maar glo nie dis dieselfde as in Brisbane nie. Wat my net grief oor die verkeer en fietsryers [hier], mense dink ‘n fietsryer is nog ‘n voertuig en baie mense [dis so frustrerend - vir my] vat ure [so voel dit] voordat hulle ‘n fietsryer sal verbygaan en dan gaan hulle heeltemal oor in die ander baan- asof hulle besig is om ‘n Titanic verby te gaan. Liewe Aarde, hoe breed is ‘n fietsryer om hom/haar verby te gaan. As ek ‘n ry karre voor my sien tou vir myle, dan weet ek: fietsryer!