Soms vlieg my gedagtes terug oor die diepblou see
na die stilte van ‘n hoëveld-somersaand daar ver,
met wolke vol flitse van storms, laag op die horison.
Ek sien dan weer hoe die nag se eerste ster
in vrede in die ruimte hang, blink en ryp, saam
met die silwer skyf van ’n sagte maan.
Dan raak my dae hier vaal en uitgewas
en die pad se spoor na voor vernou
tot ’n strepie in die gras, skaars nog wyd genoeg vir twee.
En in my woud se stiltes bly daar dan alleen net ek
en die raafswart flenterjas
van my eie skaduwee.
* * *
Kyker, ek kan met alle eerlikheid en opregtheid getuig dat ek telkens na my asem snak wanneer ek jou gedigte lees. (ongeag hoeveel maal ek dit oorlees) Jy skryf onbeskryflik mooi, maar dit gaan oor meer as net kreatiewe woordgebruik – vir my het dit daardie uitstaande naamlose kwaliteit wat my eensklaps opraap en in die kern van betowerende suiwer skoonheid vrylaat. Dankie dat jy jou unike gawe met ons deel.
Vrek. Dis hartseer.
Mooi woorde en ek dink ons almal wat in die vreemde sit voel soms so.
Pragtig, dis asof jy my gedagtes in ‘n digvorm neerpen. Baie goed, Kyker!
Mefri: Dankie vir jou mooi woorde.
Vlam: O vrek. Jammer vir die tranetrekker. Hehe.
Kaalvoete: Dankie. Ja-nee: Ek kan nie dink dat enigiemand wat van ons mooi land af kom, dit ooit uit hulle gestel sal kan kry nie. O ja: Jou nuwe avatar is regtig mooi.
Nikita: Dankie. Ek sien jy het ook by my trein-storie geloer. Dis ‘n lekker uitstappie. Ek oorweeg om volgende keer dieselfde rit in die aand te onderneem: Hulle bedien dan ‘n vyfgang aandete aan boord.
Dankie dat jy hierdie mooi woorde deel!
“En in my woud se stiltes bly daar dan alleen net ek; en die raafswart flenterjas; van my eie skaduwee.”
Jinne dis mooi!
Kyker,
Dankie vir hierdie kykie in jou siel….
Die hoëveld het ons op 17 Okt met ‘n heerlike donderstorm verras terwyl ons die kinders na die stoomtrein-werf op Germiston geneem het. Nogal net daarna jou inskrywing oor stoomtreine gelees.
Ons beleef – heel vreemd vir die vlakte – nogal heelwat haelstorms vanjaar. Maar die bosveld is lowergroen en pragtig!! Ek wens daar was tyd om berge toe te ry om te gaan watervalle soek. Ons het al vantevore hier in Palala ingery en die mooiste tonele het ons begroet… Ja, donderstorms, somerreën, felle sonskyn net na die bui, die reënboog en die bosveld wat knipoog.
Ek glo dat jy soms kan verlang
Hallo BiB en GvdS. Dankie julle.
Huisvrou: Jy laat my nou erg terugverlang na die Bosveld. Dankie vir jou lekker geselsie.
‘n Baie mooi verlang gedig Kyker. En dan kan ek ook nie help om te wonder of hierdie verlang ook dalk op my wag nie…
Mmm….verlange!!! Sulke diep gewortelde woorde …wat tog altyd sin maak.
Dankie Thea en Daizy. Thea: Het julle al iets gehoor? Ek het nou die dag juis weer iets raakgelees oor Ecuador. Dit sal darem ‘n wonderlike geleentheid wees as julle tog wel daar kan gaan bly.
Kyker hopelik sal ons iewers in Januarie weet. Elke dag is ‘n stappie nader aan die groot dag wanneer die kontrak onderteken sal word. Intussen word daar baie hard gewerk aan die voorbereidings en beplanning.
Ek hou duimvas vir julle Thea. Gits, dink net hoe lekker sal jy kan blog as julle daar woon.